Presidenti francez Emmanuel Macron theksoi se Franca do të njohë Shtetin e Palestinës në muajin shtator, gjatë Asamblesë së Përgjithshme të OKB-së.
Në një postim nga llogaria e tij në platformën X, Macron deklaroi se është urgjente të ndalet lufta në Gaza, të lirohen të gjitha pengjet dhe të jepet ndihmë masive humanitare për të gjithë popullsinë palestineze.
“Besnik ndaj angazhimit tim historik për një paqe të drejtë dhe të qëndrueshme në Lindjen e Mesme, kam vendosur që Franca të njohë Shtetin e Palestinës. Do ta njoftoj zyrtarisht këtë në Asamblenë e Përgjithshme të Kombeve të Bashkuara në muajin shtator.
Sot, është urgjente të ndalet lufta në Gaza dhe të ndihmohet popullsia civile. Paqja është e mundur. Ne kemi nevojë për një armëpushim të menjëhershëm, lirimin e të gjithë pengjeve dhe ndihmë masive humanitare për popullsinë e Gazës“, shkroi Macron.
Ai shtoi se Franca do të angazhohet për çmilitarizimin e organizatës rebele Hamas, duke theksuar se ky është një hap kyç për rindërtimin e Gazës.
“Duhet gjithashtu të sigurohet çmilitarizimi i Hamasit, siguria dhe rindërtimi i Gazës“, shtoi ai. Syri.net-Protothema
