Jetgjatësia dhe anti-plakja janë dy tema që kanë tërhequr vëmendjen e shkencëtarëve dhe të publikut për vite me radhë, deri aty sa kanë krijuar një industri të tërë rreth tyre.
Sipas Dr. Michael Aziz, patolog i certifikuar dhe ekspert i mjekësisë rigjeneruese në New York, receta për jetgjatësi mund të ndodhet tashmë në dollapin ose frigoriferin tuaj, nëpërmjet ushqimeve të thjeshta ditore që janë më të pasura me lëndë ushqyese se të tjerat.
Në një intervistë për New York Post, ai zbuloi 10 ushqimet që «mund të ndihmojnë në ngadalësimin e plakjes, përmirësimin e shëndetit të përgjithshëm dhe potencialisht në zgjatjen e jetës me dekada».
1. Perime me gjethe të errëta: Spinaqi, lakra dhe mangoldi janë të pasura me vitaminat A, C dhe K, si dhe acid folik, i cili mbështet shëndetin e trurit dhe mund të ndihmojë në mbrojtjen kundër dobësimit njohës të lidhur me moshën.
2. Arrat: Janë të mbushura me yndyrna të shëndetshme, vitaminë E dhe antioksidantë që mbrojnë shëndetin e lëkurës dhe zemrës, duke reduktuar gjithashtu inflamacionin.
3. Peshq yndyrorë: Salmoni, sardelat dhe skumbri janë të pasur me acide yndyrore omega-3, të cilat ulin inflamacionin, përmirësojnë shëndetin e trurit dhe mbështesin funksionin e zemrës. «Konsumimi i peshkut tre deri katër herë në javë mund t’ju japë katër vjet shtesë jetë», thotë Aziz.
4. Frutat e pyllit: Boronicat, ftojat dhe mjedrat janë burime të shkëlqyera antioksidantësh, veçanërisht antocianinave, të cilat promovojnë jetgjatësinë duke luftuar stresin oksidativ dhe inflamacionin. “Kanë përmbajtje të ulët sheqeri dhe kalorie, dhe janë të pasura me vitaminë C, shumë më tepër se portokallet, e cila ndihmon në uljen e hormoneve të stresit, si kortizoli“, shpjegon Aziz.
5. Çaji Jiaogulan: Një përzierje bimore e pasur me katechine dhe polifenole, të njohura për vetitë e tyre anti-inflamatore dhe anti-plakje. «Ka më shumë antioksidantë se çaji jeshil, disa thonë deri tetë herë më shumë», thotë Aziz, duke shtuar se lidhet me jetgjatësi në disa zona të Kinës.
6. Avokado: E pasur me yndyrna të shëndetshme mono-të ngopura, vitaminë E dhe fibra bimore, që ushqejnë zemrën dhe lëkurën.
7. Çokollata e zezë: “Përmban flavonoide që përmirësojnë qarkullimin e gjakut, ulin presionin e gjakut dhe mbrojnë lëkurën nga dëmtimet nga rrezet ultraviolet”, thotë Aziz.
8. Patatet e ëmbla vjollcë: Të pasura me antioksidantë dhe beta-karoten, janë ushqim kryesor në Okinawa, një nga zonat e botës me më shumë banorë të gjatë jetës.
9. Kos dhe ushqime të fermentuara: Kefi, kimchi dhe lakra e thartë janë të pasura me probiotikë, që lidhen me një sistem imunitar më të fortë dhe uljen e inflamacionit. Sipas Aziz, në pesë «zonat blu» të botës ku jetojnë shumë banorë të gjatë jetës, ushqimet e fermentuara konsumohen në sasi të mëdha.
10. Perime kryqëzore: Brokoli, lakra e Brukselit dhe lulelakra janë të mbushura me sulforafan dhe komponime të tjera bimore që ndihmojnë detoksifikimin, ulin inflamacionin dhe mund të ndihmojnë në parandalimin e disa sëmundjeve, përfshirë kancerin e gjirit dhe sëmundjet e lidhura me moshën.
