Shorti i UEFA Champions League 2025/26 ka prodhuar menjëherë duele të zjarrta që pritet të elektrizojnë tifozët në mbarë botën.
Ky është sezoni i dytë që zhvillohet me formatin e ri me 36 skuadra, ku secila prej tyre do të luajë nga 8 ndeshje në fazën e ligës kundër kundërshtarëve të ndryshëm.
Në sy bie menjëherë përplasja mes Paris Saint-Germain, Bayern Munich dhe Barcelonës, tri superfuqi që do të masin forcat që në start. Real Madrid do të përballet me rivalë të fortë si Manchester City, Juventus dhe Liverpool, duke rikthyer emocionet e përballjeve klasike të viteve të fundit.
Nga ana tjetër, Chelsea, që rikthehet në Champions pas një sezoni mungese, do të ndeshet me Napolin, Ajax-in dhe Bayern-in, sfida që pritet të testojnë seriozisht ambiciet e londinezëve. Arsenali përballet me skuadra të vështira si Inter, Atletico Madrid dhe Borussia Dortmund, duke e bërë grupin e tyre një nga më intriguestët e kësaj faze.
Edhe surprizat e mëdha nuk mungojnë: RB Leipzig dhe Benfica do të përballen me skuadra të kalibrit të lartë, ndërsa Feyenoord dhe Sporting Lisbona do të kërkojnë të befasojnë gjigantët e kontinentit.
Sistemi i ri i garës bën që skuadrat të renditen në një tabelë të vetme me 36 ekipe. Tetë më të mirat kualifikohen direkt në fazën e 1/8-ave, ndërsa ekipet nga vendi i 9-të deri në të 24-tin do të luajnë “play-off” për të siguruar një biletë në fazën me eliminim direkt.
Faza e ligës do të nisë më 16 shtator 2025 dhe do të zgjasë deri më 28 janar 2026. Finalja e madhe e këtij sezoni do të zhvillohet më 30 maj 2026 në ‘Puskás Aréna’ të Budapestit.
